أمريكا تقتل القتيل وتعمله فيلم

أسامة بن لادن

كتبَ / شريف صادق

استديوهات هوليوود مش مبطلة شغل من ساعة ما أعلن الرئيس الأمريكي " أوباما " خبر إغتيال زعيم تنظيم القاعدة " أسامة بن لادن " وده عشان يعملوا فيلم عن قصة حياته من أول ما انضم للقاعدة لحد إغتياله ؛ بما إنه المطلوب رقم واحد في العالم والأشهر في التاريخ ، وده اللي قالوه في مجلة " فاريتي " وموقع " هوليوود ريبورتر " إن المخرجة " كاثرين بيجيلو " والمنتج " مارك باول " بيستعدوا لتصوير فيلم عن بن لادن الصيف ده ، الفيلم هيكون اسمه " اقتل بن لادن Kill Bin Laden ".

الفيلم كان بيتحضرله من فترة من قبل قتل بن لادن ، وكان هيتكلم عن محاولة سرية لإغتيال زعيم القاعدة ، لكن بعد خبر قتله هيتضمن الفيلم العملية اللي استمرت 40 دقيقة في إسلام أباد ، باول كان هيسافر أفغانستان عشان يحدد مواقع التصوير لكنه أجل سفره لحد مايعرف رد فعل العالم العربي على قتل بن لادن ، ومتوقع يشارك في بطولة الفيلم الممثل الأسترالي " جويل إيدجيرتون "