البلطجية اعتدوا على عادل امام

كتبَ / نورهان محمود

اتعرض مسلسل‮ "فرقة ناجي عطا الله‮" اللى بيلعب بطولته عادل إمام لهجوم البلطجية وهما بيصوروا المشاهد الخارجية في منطقة من مناطق القاهرة. 

وحاولوا يسرقوا معدات التصوير لكنّ العاملين الفنيين في المسلسل نجحوا فى انقاذ المعدات. وده خلى المنتج صفوت غطاس يجيب عدد كبير من الحرّاس لحماية فريق العمل. ووضح غطاس أنّ التصوير مستمر دلوقتى في أمان وسط حراسة مشددة لكل اللى بيشتغلوا في المسلسل. وضاف أنّ "الزعيم" رجع من مدينة بورسعيد بعد ما صوّر هناك بعض المشاهد الخارجية. وهيسافر نهاية الشهر ده مع فريق العمل لبيروت عشان يصور مشاهد سوريا في المسلسل بسبب تشابه البيئة بين البلدين، خصوصاً أنّه يستحيل التصوير في سوريا بسبب الاحداث هناك. 

 والمفروض ان التصوير هيبدأ تانى النهاردة السبت فى "استديو نحاس" في "مدينة السينما" في الهرم. ومن المعروف أنّ إمام بيرفض دخول الصحافيين خلال تصوير أي مشهد أو استضافة أي شخص من برا المشاركين في العمل عشان محدش يستخدم كاميرات الموبيل لتصوير أو تسريب أي معلومة عن المسلسل.