طلعت زكريا رافض يعتذر للثوار

طلعت زكريا ومبارك

كتبَ / نورهان محمود

بدأ الهجوم من السبكي على طلعت زكريا وده بسبب الخسائر المادية الكبيرة اللي سببهاله نتيجة تنفيذ وعد الناس ومقاطعة فيلم " الفيل في المنديل " من إنتاج السبكي واللي بيحقق إيرادات عن كل يوم عرض أقل من 20 ألف جنيه ، ودي إيرادات ضعيفة جداً لفنان اتعود إنه يحقق ملايين بأفلامه .أكرم السبكي قال إنهم طلبوا من طلعت الإعتذار للثوار عن شتيمته ليهم أيام الثورة ويعترف بإنه كان غلطان ، لكنه عاند وصمم على موقفه ومش عارفين عناده هيوصله لفين بعد الأضرار اللي اتسبب فيها للشركة المنتجة ، وقال كمان إن كان فيه إجماع تقريباً من الناس على مقاطعة الفيلم .
أكرم علق على سبب تمسك طلعت بموقفه إن فيه فنانين - وطلعت منهم - كان ليهم أهداف شخصية ، ومستفيدين من النظام السابق وكان نفسهم إنه يفضل لحد دلوقتي ، وهما دول اللي ماشاركوش في الثورة ، لكن في نفس الوقت فيه فنانين محترمين شاركوا من أول يوم زي جيهان فاضل وتيسير فهمي وخالد أبوالنجا وغيرهم .
لكن لحد دلوقتي مصير الفيلم ومصير طلعت نفسه مجهول بعد رفض الناس ليه وعدم تقبلهم لأي عمل منه .