اخت سعاد حسني تتهم الشريف ونادية يسرى بقتلها

سعاد حسني

كتبَ / سمر العباسى

جانجاه حسني اخت السندريلا سعاد حسني قدمت بلاغ للنائب العام امبارح طالبت فيه بانتداب قاضي للتحقيق من وزارة العدل واعادة التحقيق في حادثة قتل اختها وده بعد ظهور معلومات جديدة قدمتها امبارح في بلاغها وبيتكون البلاغ من 11 ورقة سيناريو جريمة قتل سعاد حسني وكل اللى شارك في الجريمة بالاضافة لظهور شهود طالبت اخت سعاد حسني انهم ميكشفوش عن اسمائهم عشان ميتعرضوش للقتل، و المتهمين الرئيسيين في البلاغ هما صفوت الشريف رئيس مجلس الشوري السابق ونادية يسري صاحبة سعاد حسني واللى اتردد اسمها كتير بعد وفاتها كشاهدة علي بعض الاحداث الخاصة بحياة سعاد حسني واللحظات الاخيرة من حياتها.

وقال طارق عبدالرازق منسق لجنة الحريات فى نقابة المحامين ان جانجا حسنى طلبت مساعدة لجنة الحريات فى نقابة المحامين عشان تساعدها في تقديم البلاغ ومتابعة التحقيقات لحد ما يتعاقب المجرم الحقيقي اللى دبر ونفذ جريمة قتل اختها وضاف ان النائب العام وافق علي الطلب اللى قدمته »جانجا« وحول البلاغ لوزارة العدل عشان يختاروا قاضى للتحقيق في القضية.وده يثبت مدى صحة وعبقرية المثل المصرى اللى بيقول:"العجل لما بيقع بتكتر سكاكينه" وفى انتظار المزيد من السكاكين.