جيهان فاضل تطلق دعوة "ساخرة" للاستقرار

جيهان فاضل أثناء تظاهرها في ميدان التحرير

تناولت الفنانة جيهان فاضل بشكل ساخر الآراء المعارضة للمظاهرات والمطالب التي يرغب صانعي الثورة في تحقيقها.

وطرحت فاضل عبر صفحتها الشخصية على موقع Facebook موضوعا تسخر فيه ممن يطلبون وقف المظاهرات بحُجة "الاستقرار". 

وكتبت جيهان فاضل: الحمد لله حققت الثورة جميع أهدافها وكل من كان بميدان التحرير شاهد أن مطالبنا تحققت، بس الواضح أن فيه ناس فاضية عايزة تعمل فوضى واحنا مش عارفين هما عايزين إيه تانى، مش عارفين نشتغل من الدوشة اللى بيعملوها، كل يوم مطالب فئوية وعمالية، إيه الدلع ده مرتباتهم قليلة؟ طب ما يستحملوا شوية عشان احنا ورانا حاجات أهم زي البورصة وكده.

وأضافت: وبعدين ليه البتر ده؟ تلتميت جنيه مش وحشين فيه ناس مش لاقياهم، أهم حاجة عجلة الإنتاج تمشي لأن رجال الأعمال بيخسروا مليارات كل يوم مش الملاليم إلي بتتكلموا فيها يا جرابيع، وبعدين مافيش حد بيموت من الجوع والدليل إن كل الجثث اللي موجودة في المشرحة لناس ماتوا أما من التعذيب أو من حوادث نقل عام.

وكتبت: أما الاستفزاز الأعظم فهم الأخوان والسلفيين، كل شوية يعملوا وقفة احتجاجية علشان المعتقلين بتوعهم، يعني ناس بقالهم عشرين سنة في السجن مش قادرين يستحملوا كام سنة كمان لحد ما نستقر، وعلى العموم علشان متقولوش خيار وفقوس، إحنا جبنا العيال الغريبة اللي كانت معتصمة لسبب مجهول في ميدان التحرير والكل سواء في المعتقل ولو حد ناوي يعترض ده كان مطلب شعبي لدواعي استقرارية.

أما الواد المغني والتاني الممثل اللي زعلانين قوي إن الشرطة العسكرية عذبتهم، كفاية أقول إنهم كانوا مطولين شعرهم، يعني استفزاز صريح للجيش.

يذكر أن جيهان فاضل من أكثر الفنانات اللائي تواجدن بميدان التحرير أثناء أيام ثورة 25 يناير التي أسقطت نظام حكم مبارك.