إسعاد يونس: "الناس مش فاهمة إنهم كمان ليهم حقوق"!

إسعاد يونس

واصلت الفنانة والمنتجة إسعاد يونس حملتها ضد القرصنة التي تتعرض لها المصنفات الفنية، سواء كانت أفلام أو ألبومات موسيقية، وأكدت أنها سيكون لها أثر بالغ السوء على صناعة الفن المصري.

وجهت الفنانة إسعاد يونس رسالة بعنوان "من باب التواصل"، عبر الجروب الرسمي الخاص بها، الذي أنشاته لطرح ومناقشة قضية القرصنة، ويحمل عنوان "مع إسعاد يونس ضد قرصنة وسرقة الأفلام"، جاء به:

"أعزائي أعضاء الجروب"
حبيت اتكلم معاكم شوية عننا.. فينا ناس واخدة المسألة بجد جدا وشغالة ليل ونهار في مقاومة القرصنة.. عددهم قليل آه.. لكن مجهودهم رائع ويتشال عالراس.. لكن أنا نفسي نوضح الصورة اكتر.. احنا هنا لعدة أهداف.. أولا لأننا بنؤمن أن انتهاك الحقوق شيء مرفوض ويجب مقاومته.. ثانيا لأن علينا دور فى التوعية بجانب مقاومة القرصنة ذاتها.. ثالثا عشان نعرف إزاى نحمى أنفسنا منها.. حا تقولوا احنا مش منتجين أفلام يبقى نحمى نفسنا من إيه؟.. كل شيء يعرض على الملأ محتاج تنازل عن حق.. مش بس الأفلام.. الأغانى.. المسلسلات..المقالات.. الكتب.. الكليبات الشخصية..

يعنى لو انت قاعد ف مطعم وواحد صورك بالموبايل ونشر الصورة على وسيط عام زى الإنترنت ده مش من حقه.. ومن حقك تقاضيه لو عرفته.. وإذا ما عرفتوش من حقك تشتكى للموقع وإذا ما رفعش المادة من حقك تقاضيه.. الناس مش فاهمة إن هى كمان ليها حقوق.. البنات اللى بيتصوروا وتترفع صورهم أو كليبات هما طالعين فيها وبتعمد الإساءة أو الفضيحة لا سمح الله مش من حق حد يعمل فيهم كده.. مسألة إن كل إنسان مطلع موبايله ونازل تصوير فى الخلق المفروض إنها مجرمة.. القانون فين بقي؟.. ده أحد الأشياء اللى بنشتغل عليها.. الناس اللى شغالة جوه الجروب منهمكة فى الحرب.. لكن اللى مش متفرغين للمسألة دى عليهم دورين لازم يلعبوهم.. دور المشاركة جوه الجروب.. ودور التوعية براه..

فيه مجموعة بتشتغل على التعريف بالجروب وضم ناس فاعلة فيه.. فيه ناس بتعمله انتشار على الميديا.. وفيه ناس انضموا عشان يكملوا الصورة.. بيحصل دلوقتى تنسيق علاقات مع مباحث الإنترنت.. ووزارة المواصلات.. ونقابة الصحفيين واتحاد الكتاب وشركات الموسيقى والغناء.. وجمعيات حقوق الملكية الفكرية.. يعنى مثلا أنا لما بختفى عنكم شوية ببقى شغالة فى الحاجات دى.. كل اللى برجوه منكم عدم اليأس والاستسلام.. ومساعدة زمايلنا اللى بيشتغلوا بايديهم.. وارجع اقول احنا بنعمل فرق.. وحانغير وضع سيء وريء.. وده حايتحسبلنا كلنا.

أشكركم وكل سنة وانتم طيبين.

يذكر أن المنتجة إسعاد يونس قامت بإنتاج فيلم "أمير البحار" لمحمد هنيدي، والذي يُعرض حاليا بدور العرض.